الرئيسيةس .و .جبحـثالتسجيلالأعضاءالمجموعاتدخول

شاطر | 
 

 الامانة - الفصل الأول - قسم 3

اذهب الى الأسفل 
كاتب الموضوعرسالة
Admin
Admin


المساهمات : 150
تاريخ التسجيل : 26/10/2007
العمر : 61

مُساهمةموضوع: الامانة - الفصل الأول - قسم 3   الأربعاء ديسمبر 19, 2007 8:00 pm

الشرطيI: مشيرا الى الحاج محمود

تعال انتِ لهون

الحاج محمود: خير شو بدك

الشرطيI: شايف حضرتك شو عملت

شو انت مفكر حالك

بهاي لبلاد في قانون

قانون بمشي علي قبل ما يمشي عليك

الحاج محمود: اللهم لا حول ولا قوة الا بك

طيب بالمختصر المفيد شو بدك منا

الشرطيI: انت فاهم شو يعني قانون

الحاج محمود: انو قانون

أنا أجيت وفتت على بيتك ؟؟ !

انا اعتديت على حرمة دارك ؟؟ !

انا اجيت اشلحك ارضك ؟؟!

اي قانون اللي انت بتحكي عنو يا خواجه.

... ايا قانون ؟؟

الشرطيI: "مخاطبا الشرطيII"

انا قلتلك راسو عنيد وقاسي مش ممكن نتفاهم معو...

الحاج محمود: على ايش بدك نتفاهم يا سيادة الشويش

هات تعال تنتفاهم...

انا جاي ومعاي قوه جاي اخذ بيتك وارضك

ها فهمني

فهمني

شو بدك تعمل معي

بدك إترش علي سكر وورد...

شو بدك تعملي فهمني تنا نتفاهم...

الشرطيI: "مخاطبا الشرطيII"

مزبوط مثل ما قلتلك مش ممكن نتفاهم معاه

راسو عنيد

الحاج محمود: سترك يا رب... سترك...

مين فينا اللي راسو عنيد يا شويش

مين ؟؟؟

انا اللي قاعد ابيتي وبارضي لا ضربت حدا ولا اعتديت على حدا

والا انتو اللي جبتو جيش وجرافات وبدكو ترحلونا

مين يا شاويش ؟؟

الشرطيI: "مخاطبا الشرطي II "

هياك شايف يا سيادة الزابط

احنا منحكي بالشرق وهو بحكي بالغرب

انا من الاصل قلت انو ما في معاه تفاهم...

الشرطيII: لا لا

الحج زعلان شوي اسى بهدا

واحنا لازم انطلع المساجين

ونبعث المجروحين على المستشفى على حسابنا

ونعمل صلحه

بس لما الحج يمضي عَ الارض

الحاج محمود: امضي على شو

الشرطيI: زي ما سمعت من الزابط

تمضي هون على الورقه... ويا دار ما دخلك شر

الحاج محمود: الله يسلم ثمك... قوم انت واياه بلا مطرود...

ويا دار ما دخلك شر...

شايفين اسناني

ما بعد بثمي ولا سن

انا شايب قد ما ذقت بها العمر...

ظهري انحنى من مصايب الدنيا

وانت واياه جايين...

بدكو الارض

ويا دار ما دخلك شر...

فهمني كيف ؟؟!

انا بعرف انكو بتآمنو بالله...

الشرطيI: معلوم احنا منآمن بالله... معلوم\\

الحاج محمود: حلفتكو بالله

لو انتو محلي

وانا جاي اتعدى على ارضكو

شو بتعملو في

الشرطيI: هذا الكلام سمعناه يا حج في عندك غيرو

تعال قرب مني خليني اقرالك شو مكتوب بالورقه

نحن اهالي قرية كفرمندا نتنازل

الحاج محمود: مين هو اللي نحن ومين هو اللي بتنازل

الشرطيI: انتم اهل البلد

الحاج محمود: يعني انتو كاتبين باسمنا

وجايين علشان نمضي عليها

متنازلين باسمنا

ما شاء الله !!!

اكتب اذا بدك تكتب

الشرطيI: طيب اذا بدك تغير نص التنازل ماشي

الحاج محمود: اكتب بسم الله الرحمن الرحيم

انا الحاج محمود باسم اهالي القرية

اعوذ بالله...

لن ولا ومستحيل والف مستحيل

ان اتنازل ولا عن ذرة من تراب البلد

الشرطي I:وبعدين

بعدين معاك

خلص انا بطلت اتحمل

تعال امضي هون وخلصني انا وراي شغل

الحاج محمود: الله وعلي وستين سلامه

احنا جبناك لهون

الشرطيI: تعال امضي

الحاج محمود: والله

اقسم بالله

ايدي بقطعها من اساسها

لو مضت

انتو شو بتفكرو الدنيا سايبه

والا احنا ما عنا كرامه ولا اصل

انتو غلطانين

شايف هذول الناس

اسالهن

اذا فيهن واحد مستعد يطلع طيب من ارضه

انتو صحيح بتقدرو توخذو ارضنا

بس بحاله واحده...

الشرطيI: آه هذا الحكي المزبوط كيف؟؟

الحاج محمود: يمون ما يظل بهاي البلد ولا واحد طيب

يعني ما منطلع من هَـ الارض

الا على المقبره...

الشرطيI: ليش يا حج

ليش انتو بتحبو الموت

احنا بدنا نعطيكو ارض بدل ارضكو

ودور جديده بدل دوركو

الحاج محمود: روحو بالاول اعطو اهالي القرى اللي رحلتوها

اعطو اهل البروه

اهل اقرث

اهل برعم

اهل سعع

اهل صفوريه

وشو بدي اعد تني اعد...

ما في واحد طلع من ارضو الا وذاق المر

بعدين قربت صلاة العصر

انا بدي اروح اصلي

في عندكو حكي غير هَـ الحكي...

الشرطيI: طيب امضي

وبعدين بتصلي

الحاج: ما بمضي يعني ما بمضي

شو كنو كل الحكي مش مفهوم...

ما بمضي

فاهم شو

الشرطيI: مهو اذا مش بالمليح بالعاطل بدك تمضي

الحاج محمود: بالمليح بالعاطل

انا ما بمضي

يعني ما بمضي

الشرطي: يرفع سلاحه

بدك تمضي والا...

الحاج محمود: والا شو...

الشرطي: والا...

الحاج محمود: والا شو

والا بتقوسني

قوسني

يفتح ثوبه... قوس

هاي صدري

قوس يا خواجه

قوس ليش بطلت، قوس...

ليش متردد

قوس

هو احسن امضا للارض انك تقوسني

قوس

خلي دمي يمضيلك

ليش متردد...

قوس

قوس قوس قوس

تسمع اغنيه رقم (4)



بتهددني ما بتهدد

ما بتراجع

ما بتردد

بايدك رشاش النار

اطلق

لا تخاف وتحتار

اموت

اهون ما اخون

والبس

ثوب ذل وعار

vvv

هاي ارضي

وارض جدودي

ما بخاف الباروده

اجرم لحمي

كسر عظمي

اشرب دمي

احرق جلدي بالجمر

موتني مية مره

لكن

ما بترك لديار



العسكريI: وبعدين

بعدين

بدك تمضي والا تموت

الحاج محمود: قلتلك

اموت مية مرته

ولا يقولوا الحاج محمود خان

العسكري: هات ايدك وابصم هون "يشد الحاج محمود اليه قرب الطاوله"

الحاج محمود: يمسك بالاوراق

يمزقها

ويقذفها بالهواء... اختفو عليكو

" هياج على المسرح واشتباك بين الاهالي والشرطى"



- ستار-
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://yaqub.ahlamontada.com
 
الامانة - الفصل الأول - قسم 3
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
موقع الشاعر يعقوب احمد يعقوب :: مسرحيات-
انتقل الى: