الرئيسيةس .و .جبحـثالتسجيلالأعضاءالمجموعاتدخول

شاطر | 
 

 الامانة - الفصل الثاني - قسم 4

اذهب الى الأسفل 
كاتب الموضوعرسالة
Admin
Admin


المساهمات : 150
تاريخ التسجيل : 26/10/2007
العمر : 61

مُساهمةموضوع: الامانة - الفصل الثاني - قسم 4   الأربعاء ديسمبر 19, 2007 9:03 pm

"المساجين جالسون على ارض الغرفه يبدو عليهم التعب والارهاق

ويبدو ان اياما اخرى قد مرت"

علي: يا جماعه

مش عارف كيف بدي اشكركم

صحيح انا ضيعت امي

بس انا لاقيتكو انتو

لاقيت اهل بلد

لاقيت جدي "محتضناً الحاج محمود"

لاقيت اخوي "محتضناَ احمد"

لاقيت اهل كنت مضيعهن

امي ماتت الله يرحمها

كل ام بها البلد امي

انتو يا جماعه كفيتو ووفيتو

ما بنسى وقفتكو معاي

ما بنسى نظراتكو اللي كانت بدها تخبي عني السر

كيف كانت تغمرني بحنانها وحبها...

صعب علي أعبر

صعب علي اقول قديش بحبكو...

السجان: يا علي

علي: ينظر الى السجان لا يكلمه

السجان: اجاك موافقه اخلاء سبيل حتى المحكمه

علي: لا بدي اخلاء سبيل ولا إشي

انا ما بطلع من هون الا مع اهل بلدي

لويش اخلاء السبي

امي ماتت

يوم ماتت منعتوني اروح اودعها

حرمتو عيوني تشوفها لاخر مره

وجايين اليوم تخلو سبيلي... لويش...

انا ظالل هون

مع اهلي مع لحمي ودمي

يا منظل هون كلنا

يا منطلع من هون كلنا

كان الي حلم اني اشوف امي للمره الاخيره

انتو قتلتوه

واسى جايين اتقولوا اطلع

روح قلهن احنا هون كلنا مع بعض

يا الكل بروح يا الكل بظل

واحنا بعدنا... والاضراب مستمر

السجان: مهو انتو كنتو مضربين عشان علي يطلع

وهاي معي موافقه

لويش الاضراب

علي: الاضراب علشان كلنا نطلع من هون

اللي لازم يكون هون مش احنا

انتو اللي لازم تكونوا هون

السجان: عمره ما طلعت (يغادر المكان)

علي: كلب

احمد: كبير يا علي انت كبير (يحتضنه الى صدره)

علي: "ينظر الىسلة الفاكهه"

انا بقول يا جماعه... قوموا غسلو وجوهكم بلاش نظل هيك

شو بفيد الحزن... امي... الله يرحمها...

قسمتي ما اشوفها، بس انتو بكفيكو الحزن اللي انتو فيو

مش ناقص

شو يا حج شو مع قصة احمد وفاطمه...

احمد: الله يخليك يا علي... امي هي امك بلاش هَـ الموضوع...

علي: لازم نقرا الفاتحة

وهاي الحلو بعد ما يفك الاضراب منتحلى

احمد: بلاش يا علي... الله يخليك

الحاج محمود: يا علي انت ضربت مثل ما عمرو بنكسر

وهيك لما بشوفك انت وهَـ الشباب

بقول بعد بها الدنيا خير

بعد فينا خير

وقلبي بيطمني

علي: والله انتو اللي رجعتولي الامل

الامل اللي كان ناقصني

يا الله

يا الله

وين كنا ووين صرنا

ياه...

صحيح الانسان هو موقف

صحيح انها الحياه ما الها معنى... بلا الانسان

واليوم اللي شعرت اني انا انسان

انسان الو حلم والو اهل والو وطن والو كل شي...

وهذا الشعور ما شعرتو الا معاكو...

معاك يا احمد

معاك يا حج

معاك يا ابو السعيد

معاك يا ابو طه

معاكو كلكو...

احمد: وانت انت يا علي

انت بقلبك الطيب بأصلك الطيب بكل شيء فيك

ضربت النا مثل

مثل القلب لكبير

مثل الاصل اللي ما عمرو بميل

مثل ما قريتو بالكتب ولا اتعلمتو بالمدارس

وانت يا حج يا قلبنا لكبير...

بتظلك زي الحاجب فوق العين

وبيظلو اسمك عالي

ياما تعبت

ياما انهنت

ياما عانيت

عشان اتظلك مجمعنا حواليك

تحت قلبك لكبير

شو بدي اقول

مرات الكلام ما الو معنى

بس بدعى الله يظل موفقنا وتظل قلوبنا مع بعض

علي: والله إسّ بدها الفاتحه

الحاج محمود: والله خليتو دمعتى تنزل زي ما بدك يا علي رايح يصير

ها يا ابو السعيد احنا صرنا عيله واحده وخبز وملح بينا

موافق تعطي بنتك فاطمه لاحمد...

ابو السعيد: اللي بتقوله يا حج هو اللي بصير

الحاج محمود: وعلى هذا الكلام

الفاتحه

"الجميع يقرأون الفاتحه"

احمد: غمرتوني بعطفكو يا جماعه

"يعانق ابو السعيد"

علي: مبروك يا احمد

احمد: الله يبارك فيك

علي: بس فش حلو... تنسوش انا بعدنا مضربين

بس اللي بدو يدخن سيجاره فش مانع... الحفله لما نروح عَ البلد

"- الاضاءَه معتمه - والجميع ينام-

الحاج محمود في ركن الغرفه يدعو في صلاته"

اللهم فرج كربنا

اللهم خفف همنا

اللهم وحدنا لما تحبه وترضاه...

السجان: اكل

يا الله انت واياه

علي: "من فراشه" احنا مضربين

السجان: بتوفروا

علي: صباح الخير

احمد:صباح الخير

الحاج محمود: يبدو مرهقاً... يحاول الوقوف الا انه يسقط

علي: خير مالك يا حاج

الحاج محمود: ان شا الله خير

مش عارف الدنيا بتدور فيّ

حاسس حالي بدي اقع

علي: اشرب يا حاج اشرب

الحاج محمود: لا شو اشرب... مجانين!!!

احنا مضربين

علي: لا اشرب انت تعبان

الحاج محمود: لا

انا ما بكسر الاضراب

اموت اموت

لا ما بدي اشرب

علي: يا بوليس

السجان: شو... شو في

علي: الحاج مريض تعبان

السجان: مستاهل خليه

هذا كلو من الاضراب

علي: افتح لازم يفحصو دكتور

السجان: فش دكتور

الحاج: راسي راسي... يا الله هونها

علي: افتح

السجان: استنى اسأل المدير

علي: الزلمي بموت افتح

السجان: استنو هياني راجع

علي: افتحوا يا كلاب

احمد: اشرب يا حاج... انت تعبان

الحاج محمود: يا ابني ان مش عطشان...

حاسس صدري مضغوط... مش قادر القط نفسي

احمد: طيب ارتاح يا حاج... ارتاح

علي: يا بوليس... وين رحت

كيف حاسس حالك يا حاج ان شاالله خير

الحاج محمود: احسن... إسى احسن...

احمد: كيف حاسس حالك يا حاج

الحاج محمود: إسى الحمد لله زي لحصان

هاي الشغله صارت معاي كثير

انا مهمل بحالي

علي: بس ان شا الله لما نطلع... لازم تفحص حالك يا حج

احنا بدنا اياك

وانت غالي علينا

الحاج محمود: ان شا الله...

الله يخليكو... الله يخليكو مع بعض

والله شوفتكو يتفتح قلبي

السجان: مين اللي مريض

الحاج محمود: خلص طبت لا مريض ولا على بالي

السجان: المدير بيقول انك اذا مريض لازم تشرب هذا كلو من الاضراب

الحاج محمود: قلتلك طبت

ولا مريض ولا على بالي

هياني مثل لحصان

السجان: معناه انت المسؤول عن حالك

الحاج محمود:ما شاء الله...

كاين انا محملكو مسؤولية حالي

علي: روح يا عمي الله...

السجان: المره الجاي لو بتموت تناديش علي... انا مش فاضي

علي: تموتو كلكو...

السجان: شو قلت

علي: زي ما سمعت

السجان: والله كلمه ثانيه غير عَ الزنزانه

الحاج محمود: تعال يا علي... تعال يا ابني... شو بدك منو

احنا مشكلتنا مش معاه...

علي: انا عارف يا حاج... بس مش قادر اطيقو...

الحاج محمود: السجن يا بوي ما بسِكر على صحابو\\

المهم بكره

بكره لما نرجع عَ البلد

برضاي عليكو...

خلي قلوبكو على بعض

هون وحدتنا مطمنتني... بس خايف لما نطلع من هون...

نرجع نعمل قيس ويمن...

احمد: لا يا حج... لا في قيس ولا يمن\\

كلنا ان شا الله اخوه واهل

واللي كان مش ممكن يرجع

علي: شو قيس وشو يمن...

إحنا في عنا قيس وليلى مشيرا لاحمد...

احمد: "ضاحكا" الله يخرب بيتك يا علي...

يشهد الله... إنو علي اخوي يا حج

علي: مهو يا حج احنا ناس على قد الحال

بيش يعني بدنا نتسلى

فش إشي غير نتسلى إبعض

طيب تنا نروح يا احمد بفرجيك "ضاحكا"

احمد: حتى السجن معاك يا علي طعمتو غير شكل

الحاج: الله يحببكو إبعض بجاه الله...

بتعرفو يا ولاد

الله بحب الجماعه.

احمد: ولو يا حج... يد الله مع الجماعه

الحاج: مدام قلوبنا على بعض... واللهِ قوة الدنيا ما بتكسرنا

بس الخوف من انا بكره نتفرق

احمد: لا يا حج إتطمن...

اتطمن

احنا صحينا... واللي بصحى صعب يعاود يغلط

ولا يُلدغ مؤمن من جحر مرتين

الحاج محمود: بتعرفوا قصة الشيخ مع ولادو والعصي

علي: نورنا يا حج
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://yaqub.ahlamontada.com
 
الامانة - الفصل الثاني - قسم 4
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
موقع الشاعر يعقوب احمد يعقوب :: مسرحيات-
انتقل الى: